الغبي ماهو بداري - أكرم التلاوي
إلعبي يا ذي القصيده كيف ما تبغي إلعبي
لا تكتفك القواعد لا تكوني عالوتيره
أبزغي كالبدر حينا ً أو كشمس ٍ فاغربي
أو فكوني شي معجز مثل نجمات الظهيره
إجعلي هالبحر يغرق وسط دفة مركبي
ما لأطواق النجاة ايدين في صرخة هديره
اكشفي جهل العقول اللي بغباها تختبي
لا اسكتت به زمهرير ولا انطقت به قشعريره
ربي خالقنا جميع لكل عقل ٍ مذهب ِ ..؟
به فلاسف به معازف به مناسف به فطيره
ليه نِسفه من يخالف فكرنا أو نغضب ِ ؟
ليه نجامل من نخافه لو نعافه بالسريره ؟
إنتقاص الناس صوره طبق أصل ٍ للسبي
سبي حق الإحترام الراي وأشياء ٍ كثيره
ليه نقلل مستوانا ؟ نجل شأن الأجنبي ؟
وهو بذات الوقت قلل شاننا واعلى مصيره
الغبي ما هو بداري انه انسان ٍ غبي
والي يِشْخَر في منامه ما هو داري عن شخيره
عامل الطفل بطفوله دنّق احبي له حبي
كلّم ألعابه وحاول في فعالك لا تثيره
ولا بغيت ترد غافل لا تسوي انك نبي
سوق درب العربجيه لين تعرف وش خميره
ويوم تبغى لي النصيحه لا تعاكس مسربي
خذ يدي بيدك ودربي حددله خط سيره
ومن بغى يعرض ضميره لا يجي سوق العبي
يقصد أسواق النخاسه يلقى من يشري ضميره
العقول اليا تساوت منّها الدنيا اش نبي ؟
لولا شر الكون هذا ما عرفنا طعم خيره
ريحة المسك الزكيه تؤخذ بذبح الظبي
ولولا حرق العود قطعا ً ما انتفعنا من عبيره