اسرار - سالم سيف الخالدي
ما خفيته بقلبك ينقرى في عيونك
لا تحاول تخفّي لوعتك في سلامك
انت ما انته وطبعك ما تبلور بلونك
تبتسم لي وحزنك ينعرف من كلامك
كل شي فيك ينطق حتّى ثورة شجونك
زادها الشوق غيره..واكشفت لي مرامك
وين شوق التّلاقي..وين لحظة جنونك
وين وردٍ تفتّح من رياض ابتسامك
وين قلبك وفكرك..وين..سارح بكونك
كل شي فيك يدعو للتعجّب.. علامك؟
ليت يا نور عيني ما تصدّق ظنونك
في عشيرٍ تهمّه راحتك وانسجامك
في عشيرٍ شؤونه يا حياتي شؤونك
عاش منّك ولاجلك وافيٍ بالتزامك
كيف انساك واقدر يا حياتي اخونك
وانت بالقلب واحد مالكنّي غرامك
تعتقد لو جفيتك اقدر اعيش دونك؟
وانت نبضي وحسيّ..خاطري مستهامك
اطلب الله ربي يحفظك لي يصونك
واعرف انّك بقلبي ما لغيرك مقامك