وينهم؟! - شيخة الجابري
وينهم؟
ما ظنتي يدرون عن الأحوال
ولاظنتي باتوا على
ولاظنتي يذكر بعضهم
أمنا فلسطين
وأوطان حره واحتضار الغار
وينهم ؟
نامت مشاعرهم كسل
واستسلموا للعار
وينهم ؟
ما عاد يوصلنا خبر
عن عزمهم
عن عزهم
عن نبلهم
عن نارهم
عن سيفنا البتار
غايب ذكرهم
والمصيبه كثار
واحنا نتقلى عالجمر
وين ال علينا يغار
يا ذا الجمر احرق بعد
وش باقي فينا ما احترق
ما ذاق طعم النار؟
كم من وطن فينا انجرح
ونقول وقت وجار
متعودين على الهرب
يا قوة الجبار
راحت بلد
راحوا شعوب
تيتموا أصحاب
وما حد درى عن حالهم
كل العرب غيّاب
مثل الرماد اللي تخلفه نار
هم بس وحدهم
يكبرون صغار
هم علمونا فالصغر
إن الوطن نعمه
مدري اش حصل عند الكبر
صار الوطن نقمه
هم علمونا ف الكتب ان الوطن جنه
طب ليه يوم انه كبر
صار الوطن مِنّه؟
هم علمونا بالحكي حب الوطن كالفرض
ويوم ٍ تعرّض للغدر
ما حد حماه العرض؟
هم علمونا ان الوطن ترنيمة الأجيال
عزه وكرامه والقهر
كل يوم هو يُغتال
هم علمونا ان العدو موجود لاشك فيه
ويوم فهمنا دورنا
صرنا الوطن"(نقصيه)
هم علمونا ان الوطن ترنيمة الشعّار
مدري النوايا باهته
أو ماتت الأشعار
هم علمونا للأسف أوهام في أوهام
فجأة صحينا
ع الحقيقه
ان العرب نيام
الكل يهرب والاسم حريه
الكل يكذب والليالي حيه
الكل يشجب والحروف النيه
والنازفين الدمع
صار أنهار
واللي انبنى
يُهدم غصب واللي بقى منهار
يُدفن وطن
يُحرق وطن
عادي
نعيد إعمار
وين الحقيقه يا عرب
وين الهمم والثار
يا للأسف راحت سدى
يا أمة المليار ..