كلمه - ظافر الحبابي
يا ناس في قلب الشقا ويش اسوّي ؟
يشكي ندم كلمه وراها الرجا ضاع
منها نظرت مواجه الموت توّي
و احاول امحي صورته غير ماطاع
ياليتني قبل الكلام متروّي
ماكنت باجرح من له القلب مرباع
قفّا بقلبٍ في عناه متلوّي
و اومى بدعجٍ غارقاتٍ بالادماع
راحت به الكلمه حزين متكوّي
ولكل حرفٍ جمرته بين الاضلاع
ياحسرتي . ماكنت فيها متنوّي
أخطي و اصير لثابت الود نزّاع
من يوم غاب بوقتها غاب نوّي
و لفح السموم ارهى على قيض ملتاع
حتى غدا زرع الضمير متطوّي
خابت رجاوي زارعه والتعب ضاع
وصوت النفوس المستغيثه يدوّي
يالله عسا يلقا له اليوم سمّاع
وانا بمحراب الندم ومتزوّي
ألوم نفسي من خطاها و مرتاع
متى يجي ؟ ويعدّل رضاه جوّي
يرضا واخيل بوصله البرق لمّاع
من جوف مزنٍ بالموده يروّي
نبت الغرام الي كسا طاهر القاع
ويطيب غرسٍ بالضماير مذوّي
وتقَرّ به عقب الحيا عين زرّاع
وافتك وانجا من شماتة عدوّي
اللي لعلمي يوم جاه الخبر ذاع
توّي عرفت بقدر الاحباب توّي
من يوم صدّوا ماتحمّلت الاوجاع
اتظاهر اني عالفراق متقوّي
وانا بقلبي واهج الشوق قطّاع
من شوفتي ضو الخطيّه تشوّي
خافي حشاي بفعلتةٍ مالها اسناع
وانا انتظر كلمه تجي دون ضوّي
كلمة (سماح ) وبس . مانيب طمّاع