ثلاث سنين - عارف زينل

ثلاث اسنين قد مروا ووصلك مختفي برقه
ثلاث اسنين واحزاني اهي ما زالت احزاني

ثلاث اسنين انا ابكي وقلبي ينبض فعرقه
ثلاث اسنين تتركني تبي ماقول لك جاني ؟

اوقّد شمعتي والا اطفي فقلبي الحرقه ؟؟
تعال الحق قبل لا اموت وافنى مثل كل فاني

قبل مسراك انا اذكر رأيت ان السما زرقه
بعدها ما رأيت الا سواد الليل يطغاني

ترى روّحت دون اوداع هذي في الهوى سرقه
تعال امسامحك قلبي ولك تقدير اوصاني

تعال اسكن شمال القلب وفغربه وفي شرقه
ولكن خل ما باقي اذا تسمح لأخواني

ضميري عايشٍ لك دوم من طرقه الى طرقه
واذا فكّرت في غيرك يبكّيني ويعصاني

انا غرقان ؟ لاوالله عيوني بس اهي الغرقه
وقلبك في الزمن لاهي وحبك حيل ألهاني

ترى اتعبتني من جد وحبري مالقى ورقه
تعال الحق قبل قلبي يعافك وانت بأحضاني