حافي الشعر في طوى - عارف زينل

الشمس غابت وأشرقت لي منافي
والدرب لو لي عنه لكني أدريه

بترك همومي في الفراش بلحافي
وبغيب في دربٍ من الرعب أجريه

أرواح وأجسادٍ وصاحب يا جااافي
تأخذني الخطوة وأنا بدمع أطريه

وأوصل ف وادي يا طوى أو خرافي
وأولّع الأنجم بقلبي وأسريه

ليلٍ غدا في داخلي شبه طافي
بعلّم الغدران وشلون تغريه

بفرش عظامي واحضن الليل واااافي
ادري من هلالك عتابك وقاريه

اسمع وفيك الصبح في الثلث غافي
خلّه يقول اشلون حلمي يباريه

خلّه عن أمجادي يعلّم يا صافي
وشلون صافي الحلم للسلم اعريه

وإذا تشوف أشباح في شي خافي
متى القمر ينباع والشمس تشريه

غرقان في نفسي وهالكون طافي
والشعر يبغي شعر محدٍ يجاريه

قد كان للأمراض والهم شافي
واليوم يبغي من بقلبه يواريه

الشمس تتمدّد وأنا معك كافي
واللي بقى فيني من الشعر بس ريه

بلبس نعالي واترك الشعر حافي
خل الشعر يلقى قلوبٍ تداريه