أرزاق البشر - مبارك الحديلي المنصوري
توكلنا على الله ثم رضينا برزقه المقسوم
وسعي كل واحدن منا يدور رزقه وفاله
نعم نسعي ونتوكل ولو كان القدر معلوم
كتب ربي لنا رزق وامرنا دوم نسعاله
يمر ابدربي الحاسد وأسمع من وراه اعلوم
أغض الطرف واكمل وأنسي كل ما قاله
يقول فلان ذا حاسد وانا اقول الرجل محشوم
لو ايجاهرني ابغيه مارد بسي افعاله
يعزز قوله ابفعله واعزز موقفي بالحوم
على علمن بأن الله كتب رزق وخلقناله
رضا نفس وسما روحن تحليها القناعه دوم
ولو ان العطا في ايدي عطيته كل ما هاله
غريبه كيف يتعني ويتمني وهو محروم
وينكر نعمة المولي عقب ماهوكتبهاله
غريبه كيف يضحك لى وهو فى داخله مهموم
يبي لقمه وسط كفي واشوف الخير عداله
يا ليته قبل ما يسعي عرف بان القضا محسوم
وان ارزقنا بيد الذي ما تنحصي افضاله
لو ارزاق البشر فى ايد البشر كلن غدا مظلوم
ولا فينا رضا بقسمه ولا ذالقسم يهناله
ولو امراض القلوب اتشوفها عين البشر لو يوم
تفرقنا واصبح كل واحد مننا لحاله
ولكن قدرة المولي قضت بأن الجشع مكتوم
فى قلب اصحابه و يكبر ولا يرضي بما ناله
انا ما نزه افعالي ولاني مالخطا معصوم
ولكني بأمر ربي رضيت بكل احواله