صوت المآذن - اياد المريسي

الدمع طفل وكبر يحبي على اجفاني
والحزّن هذا الحزِن يعرف عناويني

تمر في خاطري لحظات وا نساني
واقسى على المحبره وتغص بي عيني

يا مكثر اللي مثل حزني ولا يعاني
وياقل من هو فهم قصدي ويبكيني

مريت (طيبه) وانا مدري اشتبلاني ؟
ضجت ضلوع الزمن وارتعشت ايديني

من قبل عدة شهور الشوق يقراني
أكتب وأكتب ولا ادري ويش يمحيني؟

صوت (المدينه) شجي غرهد وناداني
لك يا (رسول النجاة) الوجد يدنيني

(الله اكبر) تهز أركان خذلاني
من غفوتي وقتها كانت تصحيني

وقفت بين السفر والدرب واحزاني
صوت المآذن تردد صوت يدعيني

حسيت ماني ب انا ؟ كنّى وجع ثاني
ما عاد فيني ولا أي شي يعنيني

ومرت فصول الابا والعز والقاني
واقف اناظر مآذن مسجدك ليني

فجيت صدرالجهل وارسيت عمداني
ما كنت قاري ولا يانور مضويني

جيت اشتكي لك زمن ما عاد خلاني
يا كود (آه) و (دمع) مستوطنه فيني

بعدك تبعثر (خ ر ز) مسباح (واضناني)
كلْها غدت في يده من كان ف ايديني

خارت قوى عزتي واهتزت اركاني
واتغير الدرب عني من يقديني؟

مغمض على كل شي ما شفت قرآني
مؤمن بدِيني وانا متجاهلٍ دِيني

كم عام تزرع لنا؟ والذل ب أغصاني ؟
كم عز في جبهتك ؟ ويني انا ؟ ويني ؟

كم عيد مر وبكا اهلي وخلاني؟
واعض خبز الندم ما بين فكيني

كل شي ضاع ورحل يمكن على شاني
مبطي وكفّي على عيني ومعميني

اتعكز بْدمعتي لي قلت إيماني
والدين ليمن طروه أصفق بكفيني

ابكي على ما مضى والناي غناني
محتاج صفعة على خدى تصحيني

(القدس) كانت لنا يا ضيعت اوطاني
مسراك دُنس خذوه ولا بكت عيني

(بغداد) خنجر وجع مغروس ب شجاني
صوت العذارى قهر صارت تلاحيني

ما عاد فيني وجع ما مر ب لساني
وما عاد غير البكا وحده يسليني

كل شي يمر ف خيال الوقت بكّاني
ما غير (كنّا) تجي ف البال تنهيني

اخواني وْرفقتي ما عادوا اخواني
وما عاد فيني علي غيري يحاتيني

يوم اشتكى ه الجسد بالصوت ناداني
(ايدي) و(كفي) و(انا) م احنا حواليني

كلٍ سهى يا (رسول الله) ممداني
اضمّد الجرح الاول في بساتيني

الذل حنضل نبت واورق بوجداني
وياليت من برد جرحي لو يدفيني

تمر في خاطري لحظات وانساني
واتناثرت ضحكتي منهو يسميني ؟

سكبت حزني على شعري وقيفاني
يا مكثر اللي قروني في دواويني

يا مكثر اللي مثل حزني ولا يعاني
وياقل من هو فهم قصدي ويبكيني

لك يا رسول الهدى والنور احزاني
جيت اشتكي لك زمن ضيّعت به ديني