مظلوم شعر النبط - حمد بن ظافر العرجاني

شعار يااللي لكم تقدير وإكرامي
في ساحة الشعر زدتوا الشعر تشريفه

ماظن من لاذ بالاكرام ينظامي
كل ٍ يحسبه اسواة الجار او ظيفه

مظلوم شعر النبط يبقي له محامي
يعطي محاميه مهما كان تكليفه

ناس ٍ تبي تجلبه في سوق ليلامي
ذولا افداً له ولايسوون تعريفه

تجهل معانيه لاتكتبه الاقلامي
وسط الجرايد اهزال الشعر وضعيفه

كم واحد ٍ يدعي مصيوب بوهامي
لو يدعي شاعر ٍ ما هو على كيفه

درب الشعر صعب مايسلكه من رامي
اصبر يا هذا الين يتم ترصيفه

بعض الشعر ينحكم عليه الاعدامي
بالمهمله ينحذف او يحرق ابليفه

شروا الصفر لا وضع يسار الارقامي
صفر ٍ من اشمال مايحتاج توصيفه

ماكل من دش بحر الشعر عوامي
موج البحر يجرفه ميت على سيفه