خارج نطاق التغطية - دعيج البنعلي
ياحياتي في عيوني شوفي جروح الزمان
لاتغرّك ضحكة ٍ مابين عيني راسية
يوم جيتي في ثواني وابتعدتي في ثوان
ماتركتي غير ونة في جروح ٍ مدمية
ويوم رديتي عيونك تلمحي قلبي يهان
ماشفع لي موق عيني يذرف الدمعة مية
تحسبين دعيج قلبه في وعود الحب خان
وتحسبين الحب عنده بس مجرد تسمية
لاحشى والله يشهد واسألي شهود العيان
عمري وفكري وشعري دوم لجلك مصغية
وش جرى يابنت قولي لايضيع الاتزان
كلما قدمت خطوة تبعديها مقفية
وكل ماجيت اتصل رددت يالله المستعان
قالوا انه مغلق أو خارج نطاق التغطية
افهمي معنى كلامي والبسي ثوب الأمان
دام نفسي مرضية نفسك عساها مرضية
لاتخافين الفضايح لو تخسرين الرهان
ماني بنذل ٍ حشى ماني قليل التربية
الغلا هو الغلا لوشفت عرّات الزمان
والوله زاد الوله لامن سمعت الأغنية
من حنان ٍ شد عينك وانجذب لأحلى حنان
أمنية كانت بالأول واستمرت أمنية
مير شيّ ٍ ماتوقعته يصير بهالمكان
من عقب ماكانت الفرصة بدت مستعصية
زال كل الهم فيني وابتدى فرحي يبان
من لمحتك في وسط جمع ٍ حضر هالأمسية