هذي حياتي - دماث
وشي حياتي يوم أفكر بما فات؟
هم وجروح وصرخة ألام ودموع
وأحلام شدت نوخ العمر,ماجات
غربة خفوق وتابع ذل متبوع
أول كلامي بأول العمر:أهات
من أول سنيني لآخر العمر بوجوع
وأن جيت أبحكي قصتي شعر وأبيات
حسيت قلبي من المعاليق منزوع
ولأني بنت وعنصري فيه نظرات
حتى البكا في داخلي غير مشروع
إن عز نومي قالوا للعشق آيات
وأن فاض دمعي قالوا السر مذيوع
والشاهد إلي عالم بالسريرات
أجمل مضانين الهوى سلم وطبوع
ولا أقدر أقول إن الهوى من السخافات
ولا أقدر أقلل قيمة أنسان مدفوع
يفقد حبيبه ويعطي الجرح هالات
وينسى جراحه بعد شهرين وأسبوع
بلواي أنا أكبر من عنا العشق مرات
لو هي بصفات تاخذ أشوي وتموع
أروع مبادي وأشبعوها دعايات
ويوم ألبستني قالوا الناس ممنوع
ياغربة اللي هاجرت بالمسرات
من حيث سارت توها الدرب مقطوع
خل بكيته لاهو بحي ولا مات
خل دفنته في ثرى القاع موضوع
جرح توارى وأستوى ذات في ذات
جرح قديم ورده البرد والجوع
جرح زهابه مع صدى النبض ونات
مطبوع في نبرة كلامي ومسموع
سلمى عطتني من ردى الوقت صكات
وأيام سود تشقي الروح وتروع
دنيا غريبه وسيرها فيه عبرات
ندفن مصيبه وتنبت أغصان وفروع