رسالة شكر - عارف الهاشل
مبادىء قلبي تتقـدم وتشكـر قلبـك المغـرور
على ما أبدى من قسوه وجروح بصدري محفوره
جهودك مثمرة جداً وظلمـك والكـذب دستـور
يبين قسـوة قليبـك! بعـد مـا ودع شعـوره!
ضميرك غايب ولاكـن خداعـك قايـمٍ بالـدور
أبد ماقصر بجرحي واقـول الحالـه مستـوره ؟
أخبي الحزن في صدري أخاف يحسه الجمهـور
واقول إني معك مرتاح وانا اللي نفسي مقهـوره
عجزت املى عيونك حب والاقى في هواك شعور
تعبت ومـا لقيـت الا وهـم فبـلاد مهجـوره
من اللي بس يغير بك غرورك وانت له دكتـور
من اللي بها البشر مثلك يعيش بهـذي الصـوره
أبد مالك سوى قلبٍ وسط بيتـه الغـدر منثـور!
حشى مازاره احساسٍ ولا عدى الوفـا سـوره !
ولو بكشف عن وراقك ترى ماظن تكفي شهـور
بقدم لك رسالة قلب شكـى مغـرور لغـروره؟
ولك فائق تحياتـي وسامحنـي علـى لقصـور
وافهم هالحقيقه اللـي قبـل لحظـات مذكـوره
ونهايه هالرساله ذي نسخه لخاطـري المكسـور
مع توقيعي وأسمي وشهادة جرحـي بالصـوره