سمّي على قلبي - عبدالرحمن الخالدي
سمي على قلبي قبل تذبحينه
سمي عليه وقولي انك تحبيه
شيحي بوجهك قبل ما تطعنينه
اخاف يحيى لا درى انك ذبحتيه
من كثر ما هالقلب عندك رهينه
بديت احس انك بجوفك حملتيه.
كلما سمعته يشتكي من انينه
اردد اسمك يمكن اسمك يعزيه
مرة سأل عنك اذا تجرحينه؟
كذبت وقلت انك ابد ما جرحتيه
ومرة سأل عنك اذا تذكرينه
كذبت وقلت انك ابد ما نسيتيه
مابي اشوّه صورتك وسط عينه
ومابي يحس انك بغدرك ظلمتيه
واليوم هذا القلب عينك بعينه
شلته على كفي ودمعي يغطيه
قولي له انك يالغلا ما تبينه
قولي ان قلبك خان وما عاد يبغيه
خلي عتاب الشوق بينك وبينه
وخليني ابعد وانسى حبك وماضيه
عجزت المّه وانتي تبعثرينه
وعجزت اداوي الجرح كلما طعنتيه
بنيت باسمك في خفوقي مدينه
ورياح غدرك حطمت كل مبانيه
خليه عندك وسط علبه ثمينه
خليه يدري كيف كنتي تخونيه
جسمي وروحي والعقل بايعينه
وانا بعد بعته وما عدت باغيه
ما دام هذا القلب عندك رهينه
قلبٍ يحبك مالنا حاجةٍ فيه
خليه قصة للزمان وسنينه
قلبٍ يموت – وما نزل راس راعيه
لكن طلبتك قبل ما تذبحينه
سمي عليه - وقولي انك تحبيه