محبوبتي - عبدالرحمن الخالدي
محبوبتي ما هي من الجن .. لا ملاك ولا بشر
محبوبتي من جنس ثاني بجنسها وبلونها
مسكانها في وسط قلبي وعقب سلوى والخبر
احبها والقلب اصبح يا حمد مجنونها
اذا اذكروا لي اسمها كني اشم ريحة عطر
سيرتها خلطة مسك مع عنبر وريح دخونها
كأنها قطعه من الجنه وقطعه من القمر
وكأنها فتنه ثمار معلقة بغصونها
ان شفتها قال الخفوق: الحين عديت الخطر
وان غبت عنها كل شراييني بدوا يبكونها
كنها تباشير الحيا / شفافةٍ مثل المطر
وكنها اغاني الست فيروز وجمال لحونها
كنها الطهارة كلها / الا اهي اصل الطهر
وكنها العفاف اللي ستر جلبابها وردونها
لو هي تبي مني العمر/ عطيتها كل العمر
يفداها قلبي والعيون ايضاً بعد يفدونها
افديها بعيوني وروحي والجوارح والنظر
ياليتها سجني وانا طول العمر مسجونها
ماهي ملاك ولا هي جنية ولا هي من البشر
قطعه من الجنه وسيوف اهل الشرف من دونها
تدرون من محبوبتي؟ - محبوبتي دار الفخر
ديرة ابن ثاني عسى الله يعزها ويصونها
قطر هي البحرين / والبحرين هي دولة قطر
الاسم يفرق والاراضي واحدة بمضمونها
حتى البيارق واحده ما بين عنابي وحمر
نفس الشكل واللي اختلف من هالبيارق لونها
جسر المحبة بيننا ما هو من تراب وصخر
مبني من قلوب الشعب وارواحها وعيونها
مجنون ليلى قد عشق ليلى وكتب فيها شعر
واليوم ليلاي اصبحت قطر وانا مجنونها