هذا زمان المسخرة ! - عبدالرحمن الرفيع
هذا زمان المسـخره
جوال ومشيه بفشخره في وسط السوق متبختره
والكحله في وسط العيون والشفايف زود محمره
والصدر تتعمد تفكه تخليه مفتوح ما تزره
هذا زمان المسخره هذا زمان المسـخره
*****
لو يسألها ذاك الفقير وين انتي رايحه يامره
جاه الجواب يبهدله وتقول كلام بيقهره
باروح السوق ابشتري فستان للحفله المزهره
وتروح الصاله كنها عروس مزينه ومعدله ومعطره
وما ترجع الا في الصباح وتشيل الزينه الساحره
هذا زمان المسخره هذا زمان المسـخره
*****
اخر الشهر تقبض الراتب وتروح المجمع وتبعثره
وتعير ذاك الفقير لو اني مثل غيري ما عشت واياك محسره
شوف فلانه وشوف علانه عايشين عيشه ميسره
فيلا جميله وسياره كشخه ماهو مثلك تركبني سياره مكسره
هذا زمان المسخره هذا زمان المسـخره
*****
لين استلمت ذاك التلفون تبمبع مثل البقره
واتحش في الناس هذا طويل وهذا قصير وحكيها كله مسخره
وفلانه اليوم مطلقه و فلان ماتت له مره
وكلامها أصلا ماله أساس بس هذره فاضيه وبربره
والوقت يسرع والهاتف يحسب أمواله تروح مهدره
هذا زمان المسخره هذا زمان المسـخره
*****
الله يرحم ذاك الزمان الحرمه فيه مستره
كانت تجلس ويا الاذان وتصلي لله وتشكره
وتدعي للناس الطيبين بنفس طيبه وطاهره
هذا زمان المسخره هذا زمان المسخره
*****
مو مثل بنات هذا الزمن تركب ويا الأجنبي بيدها روج ومنظره
وقصت الشعر أخر موديل كأنها ديك منفوش جناحه وعرعره
والعبايه تحطها على الكتف حتى الشعر ما تستره
ولو تقول لها هذا حرام قالت كلامك كله دندره
كلامك كله ما يعني لي شي آنا فتاه متطوره
لا يخدعونج بأسم حضارة هالزمن آخرتها تالي المقبره
وآخر كلامي بالصلاة على النبي واياه العترة الطاهره