البنات - عبدالرحمن الرفيع

غمض عيونك تصور .. بلده ما فيها بنات
الشواطي .. خاليات
الشوارع .. خاليات
المجالس .. خاليات
فتح عيونك و قلُ لي مثل شنهو هالحياة
و شكثر ثم شكثر ثم شكثر .... لولا البنات
شكثر كانت .... كريهة هالحياة
من حكيهم من ضحكهم .... يضحك اللولو يتناثر بالمئات
من سحرهم .... تنسحر دنيا بكبرها
تنزل نجوم السما .... تمطر ورود معطرات
هم ساس الساس .... و تاج الراس
و شكثر ثم شكثر ثم شكثر .... لولا البنات
شكثر كانت كريهة هالحياة
وانت طاير و انت طاير .... منهو يطرد عنك هموم السفر ...؟
[( البنات )]
و انت قايم و انت نايم .. منو دايم
يفتح عيونه عليك .. يسهر يبات
قلُ لي منهو اللي يخلي .. قلبك الخامد يشب غير البنات
و انت متضايق .. و غرقان في الزعل
منهو يقلب عيشتك .. المره عسل
و شكثر ثم شكثر ثم شكثر .. لولا البنات
شكثر كانت كريهة هالحياة
قـولـوا ... امـيـن
قو لـوا .... امـيـن
ان دعـيـت الله يـخليـنا هـالبنـات
الله يحفظهم
يكثرهم
يزيدهم فـي الحـلاة
و قـولوا .. هت
قولوا ... هت
ان مـا كـتبـت فيـهـم قصـايـد قـولـوا هـات
و ان سكـت انـا .... سـألـوا لـيـش الـسـكـات
الكلام فيهم هو المطلوب .... هو المرغوب هو المحبوب
و غـيـره خربشات
و شكثر ثم شكثر ثم شكثر .... لولا البنات
شكثر كانت كريهة هالحياة
دائماً .... صوت البنـات
في الاغاني
و الاماني
و انت اول .... و انت ثانـي
الحكي عنهم و فيهم ما يتوقف لحظات
و انـت جـاهـل .... و انـت شـايـب
و انـت اعـزب .... و انـت خـاطـب
مافـي واحـد .... شفته تايـب
عـن اسـم .... اسم الـبنات
و الاسـم كله بنات
و شكثـر
ثم شكثـر
ثم شـكثر
لولا الـبنات
شكثر كانت كريهة هالحياة !