الدنيا - عبير بنت أحمد

غبيه يالقلوب اللي تبي في ضيقها إنسان
إذا الإنسان في حزة رخاه.. اْ يخون محبوبه

أدوّر بالنقا روحي ولا ألقى سوى الخذلان
واسّحب حافي رجولي على الأشواك مغصوبه

نعم .. ياما انظلمت .. ودعوتي ما عنّها بيبان
ولكني تسامحت و جرعت الظلم من كوبه

وش ارجي من ورا دنيا مشى فيها نبي ..وانهان؟
رفعت الرايه البيضا على ذا الوقت وحروبه

انا ما جيت للدنيا رجا مخلوق ايًّا كان
ولا يوم ٍ بقول لطيبتي .. ياطيبتي توبه

ولانيب انتخي دنيا ً دنيّه في زمن خوّان
مدام ان الله العالي حفظ للحق مسلوبه

عباتي تستر عيوبي و راسي لابس ٍ تيجان
وعزِّي مالي الدنيا ب ذل ٍ لابس ٍ ثوبه

أبهرب من عبير الورد واترك عطرها الذبلان
عجزت استفرد بْحالي وانا لاحقني اْ هروبه ؟!

حبيبي يا إلهي .. أشتكي لك قلبي الشفقان
وذولا كاتبَينه وانت تدري ويش قالوا به

سألتك رحمة ٍ تقبض جروح الروح يا رحمان
ومتعة شوفتك غاية مُنى الخافق ْومطلوبه

على الدنيا السلام إن كانها ما عمِّرت بايمان
سلامي واعذريني لو رحيلي قصَّر اسلوبه