نوبة جنون - عبير بنت أحمد
بدّيت عقلي على الخفاق بدّيته
والظاهر انّه نهاني قبل يبداني
غيرك يجي لي .. ثلاث سنين ما جيته
وإلا انت تِشِّر .. وتدري وين تلقاني
مثل الملاك .. وْ بحبك صرت عفريته !
يا شيخ تكفى وش اللي منْك ما جاني !
واللي يعذرب من الأصحاب ملغيته
ما حدّنا الله نخلِّي حاسد ٍ هاني
ياناس لولا عيوبه ما تمنيته
الكل منا يكمّل ناقص الثاني !
من دون حبه وش اللي فيه لاقيته؟
غير انه اول بياض ٍ يخرس الواني
في عز ضيقي .. وعطره يوم شمّيته
دنياي صارت ربيع ٍ فل ّ حجاني
لبى التواضع قصيدي يوم ناديته
وإلا المشاعر تموق فكل قيفاني
باب القصايد على فرقاه هجّيته
لكن حبه وربي يعقِد لساني
لاجيت بكتب "كرهته" قلت : باغيته
وان جيت ب العن وصوفه قلت : يهناني
أخفيت شوقي واحَسْب اني تحديته
ولقيت ظلي سبقني له و خلاني !
لا ما تناسى هواي ولا تناسيته
شوفو عيونه معي هالحين تقراني
واذكر برمشة عيوني كم تباطيته
وادري برمشة عيونه كم تباااطاني
يا ليت دربي يوديني على بيته
والشوق قفلي / ويمسي الحب سجاني
هذا .. وعقلي ترى ينقال بدِّيته
وشلون اجل لو ببدّي فيني جناني ؟ !