يا رب - عبير بنت أحمد
يا رب .. كانه ما حصل لي ألاقيه
والقى معه روحي و نبض ٍ فقدته
خذ عمري اللي باقي ٍ لي .. فلابيه
أنا وعَدت .. وبأوفي اللي وعَدته
الـ (لا)..لغيره.. بس له..تنقلب (إيه)
وقّعت بإسمه خافقي واعتمدته
الله و اكبر من كثر ماني اغليه
لا زاد هجرانه/ من الوصل زدته
عهدي به اصلاً..مايجي لين اناديه
واليوم ما جاب الندا ما عهدته
مليت انادي وانشد الكون وش فيه؟
ولامن مُجيب - إلا الصدى - لا نشدته
ولا من سألني خاتمي وين راعيه
أهذي عليه.. وأحسب اني أفدته
إحتار صوتي بين الآهات والـ (ليه) ؟
وباقي الحكي ضايع ولوّي وجدته
تضيق بي دنياي إذا جِيب طاريه
حسره على وقت ٍ معه ما قعدته
وقتي يا إما ْهجوس والا مشاريه
نفس الشريط اليا انتهى..قمت عِدته
أخفي دموعي بـ إبتسامات ووجيه
واوصف جنون ٍ فالهوى ما شهدته
والهمّ ؟ إبن ٍ ما اعَرف كيف اربيّه
والا الفرح ؟جا ميّت ٍ من ولدته
يارب ياللي مالي الا انت اناجيه
ولا غيرك احد ٍ في حياتي عبدته
خذني اذا انّي بعد موتي بألاقيه
وش لي بهالدنيا عقب ما فقدته