جنة النوار - لولوه الخليفه
عَنَت على بالي قصيدة وعَنِتي زَواره
يوم اتِخطرف بالشعر،، يوم اسبقت من قالت
كَني معا سيل الشعر ريضانه وأزهاره
وخلت الطيور اللي معي غنت قصيدي وشالت
مثلي وعلى البحرين يعقد للثرى نَواره
ويعلق إلها من القلايد ورد فيه اختالت
هذي الجميلة اللي عليها من الجمال إإشارة
ولجيدها صف الجمان أزكى الجيون اكتالت
بيني وبينك يا الرمل قصة عميق أسراره
بيني وبينك يا الذهب دفوة يدي لي طالت
بيني وبينك من حوى قلبي وداري داره
ولو دار داري دورت ريحه لريحه مالت
أحبها ريحة بلادي وجنة البحارة
وأحبها نخوة أهلها اللي عصفت ثم جالت
أحبها ديرة حمد يكفي حمدها بشارة
يكفينا عزٍ طلته بين الرجال ال والت
مثله البدر وسط السما وكل النجوم غباره
ومثله الشموس اللي أنارت بالضوا قد عالت
أحبها ديرة هلي من راسها لحواره
عَز الله اني من غلاة الدار روحي سالت
أحبها برد وشتا وأحبها حراره
وأرضى لها منع وعطا وكلي لها لو اغتالت
أحبها جردى خلا متزينه خضاره
كلها بعيني نفسها الزينه اللي لالت
حورية البحر البست من الحلاة اسواره
نقشت على أطرافها تاريخ من له دالت