هنا تجلس - نورة الدوسري
هنا تجلس على خدها تحط ايدينها .. وتسرح
تناظر بالمرايه والحزن بعيونها قد لاح
يشتت فكرها صوتٍ من الخارج وثم تفتح
دريشتها.. وتستنشق نسيم الصبح .. به ترتاح
وفجأة تذكر الشاهي برد .. والوقت ما يسمح
وعلى استعجال رشت من زجاجة عطرها الفواح
وخطت كِحلها في عينها من أجل ما يفضح
بقايا هالسهر في وجهها .. يمكن يخبي اجراح
توقف لحظة ..تفكر .. سؤال ف بالها يُطرح
نسيتي شي ؟! وتتذكر .. نست اي والله المفتاح!!
نست كل شي حواليها.. نست وشلون إهي تفرح
نست .. بس ما نست حبٍ على كثر الجفا ما انزاح
في وقت الدرس تتلهى بدفترها وتتصفح
يذكرها شطر في آخر الصفحة بوقتٍ راح
ويسرح بالها لاقصى حدود الفكر ثم تلمح
خيالٍ يشبه الغالي ينادي صمتها ب إلحاح
تدوّر من حواليها وتلقى استاذها يشرح
ويسألها تعيد اللي سبق في موجزٍ وايضاح
وتتلعثم .. تبي اتلملم بقاياها ولا تفلح
وش اللي ينتظر اكثر .. وفيها كل شيٍ باح
على خدها تطيح ادموعها.. وشلون بس تنجح ؟!!
وهي لا مرّها طيفه غدا هالحزن فيها و لاح