دنيا غريبه - أحمد الناصر الشايع
دنيا غريبه ماعرفنا لها اجناس
يصفق بنا الهاجوس في كل عاير
في الصبح نوم وتالي الليل هوجاس
نهدر كثير الوقت مافيه غاير
وكل يحسب انه على العين والرآس
وكل يسوي شيء من غير شاير
يمضي زمانه مايقيسه بآقياس
ويروح من عمره سنين غباير
مايدري ان الوقت جاري وحساس
وماكل مخلوق معصوم وجاير
اعرف دروب المرجله منبع الساس
وانهج بها في منهج الطيب ساير
واترك دروب اهل الرذيله والادناس
وابعد عن الشبهات لاتصير حاير
وارفه مكانك منزلة حر قرناس
ينزل منازل شامخات عماير
وعز نفسك لاتنازل وتنداس
وتصير مثبور بك الوقت ثاير
ولاتشكي همومك على كل جساس
يفرح بهمك لو يبين عباير
ولا تفشي اسرارك في كل مجلاس
وخلك طويل البال لاتكون فاير
واصبرعلى ماجاك والصبر نوماس
ولا لاتندم لوتمر بخساير
وخلك على الشدات والضيق نبراس
وكل على شوفتك يعطي البشاير
وخلك على دينك غيور وحراس
واحذر فتاوى الساقطين الفجاير
واسلك طريق المصطفى هادي الناس
واكثر صلاتك كثر مزن الهماير