لاتسألين الشمس - إبراهيم الوافي
اسافر وش بقيلي منك
إذا سافرت عن صوتي
ووش يبقى من ايامي
إذا خطواتها موتي
أموت ومن درى عني
أنا ماعاد أشوف اللي بقي مني
اشوفك بس
وأسال ساعة الذكرى
متى تطلع علينا الشمس ؟!! :
( لا تسالين الشمس عن طلعة الشمس
الشمس نسيت صبحها في عباتك
ما بين حزن اليوم ومواعد الأمس
ماعاد تفرق ميتتك من حياتك )
أسافر وأحتمي بالنور
أشوف إن الحنين شعور
وأقول انتي
ظلمتيني وانا صابر
الأول وعدك المشروط
وأنا شاعر
يخونه حرفه المنقوط
ظلمتيني وأنا صابر ..!
وفالثاني
وعدتيني
وجيتيني
وأنا في أول النسيان
عرفت إن الحنين شعور
وإن الشوق ماله سور
قعدت بشرفة الأحزان
وغنيتك :
( عمر الهوى ماعاش مع شهوة الهمس
لو كان يكبر حبها في شفاتك
لكن يجوع الليل والوقت ما يحس
لازم يجيك الصبح نوره مماتك )
ظلمتيني وأنا صابر
وفالثالث تركتيني
أدور عن بداياتي
وهقواتي
وقفت بشاطيَ اللهفة وكلمتك :
(( لا تسألين الشمس عن طلعة الشمس
الشمس نسيت صبحها في عباتك
ما بين حزن اليوم ومواعد الأمس
ماعاد تفرق ميتتك من حياتك )