إنتظار - إبراهيم الوافي
ارجع لبرد وسادتك وش تنتظر
ما يحتملْ شوقكْ تجاملْ بالسلامْ
من يقدر يسلِّمْ على خد القمر
لا ضاعت البسمة مع شفاة الزحامْ
يا ماشية فوق الزجاج اللي انكسرْ
من دون جرحك بعمي عيون الظلامْ
لا عاده الله ألف شاعر ينتحرْ
من قبل لا يكتبكْ فسطور الغرامْ
الله وأكبر من هواجيس القدر
لا طالت الغيبة تذكَّرتَ الخصامْ
يا صادقة بالوعد يا همس المطرْ
يا مسافرة بالجرح من فوق الغمامْ
واللي جعل فيني مثل كل البشرْ
أخطي وأسامح وأحتمل جرح الكلامْ
ما جيت لك طامعْ ولا جيتكْ قهرْ
ما جيت بابكْ غير لعيونك سلامْ
إن كان صوتي جرح ما ينفع حذر
وإن كان حرفي هم عن شعري بنامْ
أبغى أسألك وشلون يبعدنا الضجر
وانتي وانا دايم مثل ولف الحمامْ
الليل يكتبنا على صدره شعر
والصبح يقرانا بصفحاته غرامْ
ارجع لبرد وسادتك وش تنتظر
قالت : ( بكيفك تنتظر مليون عام ) ..!!