سيد المترفين - تركي حمدان العنزي
سيد المترفين اعلن حلوله
جمعتنا تبوك ومد يده
اقبل اقبل تقل مهر جفولة
ثم سلم وهو نفس مودة
كنت اعد الزمان ارجي وصوله
صرت اسمي على عيني وآعده:
وش يحدث غضاضه عن نحوله !؟
ناحل غض كنه حرب ردة
فيه حكمة تباريها طفولة
كنه السر في من باح سده
عاد انا جيت ارحب شفت لوله
عاد انا شفت لوله غبت مدة
سيدي واسرج لقتلي خيوله
شاف طرفي غزاه وقال آصده
يحسب ان عاشقه يصبح عذوله !
كيف ؟ ماادري ! ولكن : من يرده !؟
ألف بسم الله الرحمن حوله
والف بسم الله الرحمن حده
هو على الارض زول مثل زوله؟!
لا حشا ! فيه قده ؟ مين قده؟!
إن تبسم يصير الورد دولة
وان تجهم يخون البحر جدة
وان تلعثم خذا الريحان جولة
في شفاته ، قبل يرجع لخده
ينهب القلب حتى في ذهوله
لاقرا دفتري والحزن شده !
كيف اجل لو فضح خلي ميوله
للاغاني وكن الطيش هده !
حين اشوف العصافير الجفولة
تستحيل لحرار مستبدة !
والله اني لانوله ثم انوله
نيتي غصب لكن جت بوده !