الوصية - رشيد الدهام

رح فمان الله والذمه من الذمه بريه
لا تخاف من المفارق .. رح عليك الله وأمانه

رح بعيد.. ابعد من الدمعه على العين الخليّه
رح بعيد .. ابعد من الشرهه على ضحك الميانه

وابعد من الحلم للي خاب ظنه في خويّه
وابعد من الياس للي طاب حظه في زمانه

لو تروح أبعد من حدود السماء والجاذبيّه
والله إن تبقى قريب .. اقرب من القلب لحنانه

تنتشر فيني شتات جروح .. مثل الروح حيّه
تختفي في كل عرق .. ولا فقدتك قال عانه

يا بعد عذر الفراق اللي قبل فرقا الخطيه
ويا بعد ذنب الزمان اللي قبل عذر الخيانه

ليلة وداعك .. على كثر الحروف الأبجديه
ما لقى من ودعك حرفين ينطقها لسانه

قلت لي : بنساك .. قلت : الله يهنيك .. وهنيّه
واحدٍ خلاك من رباك تنساني عشانه

قلت لي : قلبك لا ينسى .. قلت : ليت القلب فيه
دوره وليا لقيته وصّه ورده مكانه

وصّ نفسك .. ولا أنا مانيب في حاجة وصيّه
واعتبر فرقاك أمانه .. والله الله في الأمانه