يا(....)ء - رشيد الدهام

لاضاقت الدنيا وضاقن الانفاس
ياحلو سجات النفس بالقصايد

يروي به قلب ومعاليق يّباس
ويزهر بها طرس ويراع ووسايد

وياللّي تركت اسمك نقط بين الأقواس
أخذ القصيد وخل حكي الجرايد

الشعر له لمعه وشمعه ونبراس
وله في قلوب الناس نخل وجرايد

وله شاعر يبني بيوته على ساس
وله ملهم يلبس جداد الفرايد

وأنا كتبت الشعر للشعر والناس
مالي ورا قول القصايد فوايد

ماقلته اطمع في شهادة ومقياس
ولاقلته اقنع راي ناقد محايد

صبيت فيه من البحر وزن وقياس
واشعلت به نار شوقي وقايد

وقطت به لليل حلم وهوجاس
ومشيت به درب طويل ونايد

حتى تغنوا به عديمين الاجناس
ولبسنه خشوف الصبايا قلايد

والاّ انت لو مايعجبك ميت إحساس
شاعر ولكن فيك الاحساس بايد

والناقص اللي دوم يزعل وينحاس
لاشاف به غيره من الناس زايد

من كلمتك مازعل ولااحس بالياس
قد قالوا امنول..رضا الناس كايد