الصمت - رشيد الدهام
الصمت يكفي ويشفي صدر راعيه
لاصار كل الحكي ماله معاني
والقلب ماعاد تعنيه المشاريه
والعين ماعاد تغريها الاماني
والخاطر العمس من يقدر يسليه
الناس ولا الشعر والا الاغاني
ياكاتب الحزن في داخلي وقاريه
في نظرتي في انفعالي في حناني
ياليت حزني محدد دمع وابكيه
ماهوب عايش معي بين المحاني
ماهوب يظهر علي واحاول اخفيه
وتصير نظرات حزني هي لساني
مدري ذكرني زمان كنت ناسيه
مدري ذكرت الزمان اللي نساني
كنت اعشق الجاي باحلامه وامانيه
يامابنيت بخيالي له مباني
ياما رجيت الوطا من مده اياديه
حتى خذا كل شي وما عطاني