ياذيب - سليمان المانع
الياس مولود الرجا والأمل شاب
ياعل ضيفٍ جارحينه معازيب
حاولت قتله بالتفاؤل وبحراب
اردةٍ لا صوبنه معاطيب
مددت زاير غفرتي مير ما هاب
كثرت زياراته عليه بـ تعذيب
عاند وعاندته وحارب ولا تاب
زرع خوافي صغير السن بالشيب
صبري بـ قساوة واقعي والزمن ذاب
وياسي تسرب داخل الروح تسريب
هذا من الحظ المشقى وماجاب
اقنص به الزيناب ياذيب ويخيب
لو هو معي لو مره ساعف وطاب
صاب الهدف تكثر عليه الاساليب
مير المصيبه حظي تراب بـ تراب
حتى صلاحي مال وان صار تخريب
وايقنت بالاقدار مكتوب بـ كتاب
ياتي ولالي في نصيبي معاتيب
دام العتب سنوه مابين الاحباب
اعتب على منو مع الناس ياذيب
لاخلٍ بدنياي ولا لي اقراب
احس كل الناس عني اجانيب
لاعاتبٍ يامسندي ولا اقل عتاب
دامي بهالدنيا قليل الاصاحيب
ناسٍ تغني للغني عز الاصحاب
وشرواي ماله رغبةٍ خالي الجيب
رميت حبي للخلايق ولا صاب
واستوحشت روحي غصيبه بلا طيب
واجبرت اعايش غربتي مثل الاجناب
مالي على كل الخلايق مطاليب
لاحسبوا مابين منهوب نهاب
لي الشرف مالي مع الناس ترتيب
اعيش واقع غربتي بين الاجناب
وادري انتسابي بينهم قمة العيب
لو سلسلوا صدق السلايل والانساب
فعلاً عرب لكن بـ حاجه لـ تعريب
عار اغترابي بينهم ماله ذياب
عايف حريرٍ به مهانه وتهزيب
لو حاولوا في عالمي صاروا اغراب
طبعاً هي الدنيا مليّه اعاجيب
صادق بـ هرجي ومدعي الصدق كذاب
ويحتاج من رب المخاليق تأديب
مابي اشتكي لك حظ كذا معي خاب
ولا ابي اشتكي جرحٍ صعيب التطابيب
ماانته من الي دونهم واضع حجاب
اشكي طموحي ياقليل العذاريب
ودي ارده عن شقايه والاتعاب
بشعرٍ يهذب مادر النفس تهذيب
انت الصديق الي له البوح ينساب
وارتاح لا اسندت يمك مكاتيب