أرجوك تنسى - سليمان المانع

أرجوك تنسى الذكريات القديمة
تجديدها لا بد يجرح حدينا

ضحك القلوب الطاهرة والسليمة
جرح العيون بصمتنا لابكينا

خل التفاصيل الحميمة حميمة
كانت مجرد تجربة وانتهينا

ما للعتب من بعد نكران قيمة
ولا ينجبر كاسٍ تكسر بايدينا

خلك مثل ما كنت عندك عزيمة
وقل للذي يذكر هوانا، نسينا

للحب روح وللمحبين شيمة
لازم نشيل جروحنا لا نوينا

غرق هوانا وسط بحر النميمة
بس أشكر الله يوم حنا نجينا

ظلم انفصلنا وإن رجعنا ظليمة
طّول زعلنا لين فيه ارتضينا

نموت حزن ومستحيل الهزيمة
حنا نكمّل دربنا لا مشينا