تحاك - شايع العيافي

على زرفالة جمال المحامل وامتداد البيد
ذكرتك فالغياب وسقت شرهاتي على روحي

ضربت جنوب سمحات الركايب وانتحيت بعيد
مناحرها على طور المكان المبعد الشوحي

مع الليل البهيم ونسمة الساحل براس الحيد
فلا صوت على سمعي ولا مايشغل شبوحي

وانا من سامر النجمه على العوكاس والتعقيد
وهاجوس تنابيه الطعون وينكث جروحي

قصير النايحه ماله عن وجيه الهموم محيد
ليا ناح الضمير شوي.. قال لجارته نوحي

يبادلها الطواريق القديمه يوم سيد الغيد
على لحن الغرام يجره من الوجد مشفوحي

يامن يامرك بامر الله وتفعل ماتشاء وتريد
هواك اللي تركني في عقاب اخطاك مطروحي

حرام انك ذبحت الروح ذبح الفدي يوم العيد
وانا سلمت لأمر الله وماقدره في لوحي

بعد شديت وقلوب الحبايب في يدين القيد
ماعاد لسكرة اجفان السهر بالنوم مصلوحي

يمر الليل بسدوله ونومي مثل شرد الصيد
يذيره الزمان اللي على باب النوى يوحي

لك الله واحد .. زوده على زود الملوك يزيد
ليا لمس الضلوع وقال يا روح الغلا فوحي

اسالك بالذي نولي له الأيمان والتوحيد
بقالي عندك من الذكر ماترضيبه طموحي

تحاك وردلي صوتك وعايدني بيوم العيد
لا تسكت لا دعيتك.. وان نشدتك قلت ماتوحي