يا عيد - شايع العيافي
ياعيد كيف اقفي واخليك ياعيد
حرام مالي عقبك الا الندامه
ياعيد ماللشوف صبر على البيد
اليا انتحى وردت حبال الوهامه
ياعيد فسلوم العرب والتقاليد
مايهجر المسلم ويقطع سلامه
وانا عليك أطرح سلامي تراديد
ولا كني الا من حيود العدامه
ياعيد لاتشمت علي المقاريد
خلك تبين لي وراهم علامه
قدامهم خلك صدوق المواعيد
واليا انتحوا صدك وعمر خيامه
العام ضيقات الخواطر شواريد
واليوم مالت بالهموم العمامه
ياناس سمولي رضا تالع الجيد
لو البس من الود ثوب الرخامه
اثور من بعض التصاريف وآهيد
وأجبر عزومي بريش النعامه
ابغا ليا كثرة علي المناقيد
اجاوب الدنيا بربع ابتسامه
وانا ادري أنه كايد الوصل وبعيد
غدر النسا حتى تقوم القيامه
الواصلات الباديات التصاديد
النازحات معنيات المسامه
الضاحكات المبكيات الأواليد
القاتلات الود بأول حلامه
الماجنات الآسلات الأخاديد
نعمة حلال الله ونقمة حرامه
اشباح لكن كلبوها من الغيد
وان جاز ظني ماعليها ملامه
العيب والله في قلوب الأباليد
نواظر حمراء وقلت صرامه
وانا بلشت وسبتي كلها عيد
عسى جهنم تستعر في عظامه