اخطيت - شايع العيافي
الرجل ماتقطع يساره يمينه
ياعم....!! روحي ظلم لاتبتليها
اخطيت وانت من الثقال الرزينه
وزعلت وانت الأرض واللي عليها
سمعت فيني : ناقلين الضغينه
كنّك تدور حاجةٍ تحتريها
وتركتني لأحلى ليالك رهينه
ارجع بهاجوسي لها واشتكيها
يذبحني المسرا واعاتب ضمينه
جفنٍ ليا ذكّر طعونك نسيها
ياعم ياهم الضعن والضعينه
ان قلت احبك ..قلت فيها وفيها
كلمه لها طينه وكلمه عجينه
تبيعها بالزود ماتشتريها
وانا زبنتك من حياة الغبينه
الليله اللي ماتجيبك ما ابيها
تكسر علي هم القلوب المتينه
وتركي علي جمرة جفا واكتويها
تاخذ مواخيذ الجمل من حنينه
وتترك متاريك الصخا في يديها
العبد مبلي .. والشقا في جبينه
عبره يوادعها وعبره يجيها
ياعم : انا احبك ونفسي سجينه
اقنع : وخذ كلمه : وانا مدعيها..!!
واللي حما الكعبه وعز المدينه
انك يا روح الروح منها وفيها