آخر الأسبوع - شايع العيافي

جيت للهم غصب وجاني الهم طوع
صدة الحظ .... ورتني علاماتها

الرزايا ترادف .. والمنايا رتوع
ولاتموت القلوب الا ... بحسراتها

لاتسل عن حوال ولاتسل عن وقوع
باركٍ من عنى الفرقا ولوعاتها

مابقى وآتفقد بين حدب الضلوع
غير روح يجر الوجد زفراتها

كل ماعرض الهاجس بزين الطبوع
غرغرت للوفاه .. وذقت سكراتها

راح يوم الخميس.*. وراح يوم الربوع
والله اعلم عن الجمعه.*. وش سواتها

مذهب الود مثلي مايسمى جزوع
يوم عيني عليه تكض عبراتها

تبكي اليوم كله.!! والشهر.!! والسبوع.!!
والليالي.!!... دقايقها.!! وساعاتها.!!

حاجة المبتلي....!! والخل عيٍ منوع
والبلا كان فزاع البخت فاتها

جادلٍ تسهج الفرقا بقلبٍ بتوع
لين يبست نواظرها بلداتها

كل مادنقت لله سجود وركوع
غورقة بالدموع ..ويبست شفاتها

قضها طاري الفرقا وبعد النجوع
لين مرت على ...بقعا وصكاتها

هرجها سكرة العاشق وسحر السموع
والذرابه عوايدها وعاداتها

كل ما حل طاريها لبست الخشوع
كني ارتل الأعراف باياتها

نسل قوم تصافق بالجموع الجموع
والحلا .. ورثها والستر ... لاماتها

ياحمد .. كان تنشدني وجاهك شفوع
في..؟ ماحد حشا....!! سوابي سواتها

ساقني بالغلا سوق البدو للنجوع
ميسمٍ بين مطرقها وعرقاتها

بلغوها ترا مانيب فيها قطوع
وانها جنة الدنيا ولذاتها

ازعلتني ورحت ولا نويت الرجوع
واثر الأطياف ..تسلبني بهمساتها

احسبني ليا قفا ضعنها قنوع
واثر نفسي تشيل الموت... بسكاتها