يابو حمد - شايع العيافي
يابو حمد وقع بي الوقت وقع
وقع الصفر يوم اتقادح بطونه
لا والله الا تو ستري تمزع
مزع على مافات ماله نمونه
البال ضايق والمحاجر تدمع
والصبح لقاني مشابك متونه
ماغير اصفق راحتي وآتصرع
والصبر مثل احبابنا حيل دونه
ولولاي عن بعض العلوم آتورع
يمديني آرد البرا في طعونه
ماني نديم الصبر يوم آتجزع
لاوالله الا بي من الضيق بونه
تكفون مادام الكتوم يتمنع
ردوا له اللي صار ياللي تجونه
عليه فتق الروح قام يتوسع
الدين ديني والقضى من عيونه
العام اجاذبه الغلا وآتمتع
واليوم لا زوله ولا تيلفونه
قفوابه اللي ضدهم مايمنع
واطرف عربهم ماله الا المهونه
حل الفراق وكل شي متوقع
الا وداعٍ ماتلايم ضعونه
اول مواري لوعتي يوم ودع
برد وهبوب النود تشلع ردونه
واتلا المواري حولن اربع اربع
مع زفرةٍ بين الضلوع مغبونه
علمي بصوته يوم قام يتقطع
عزاه ولى والمشاعر تخونه
يابوحمد عيني عليك اتطلع
امكان باقي حل لا تذخرونه