عقّب صبي هيبته مستباحه - شايع العيافي
عقب صبي هيبته مستباحه
عليه من عيلات قوم مضره
دنياه ليل ماتبين صباحه
صيد لنظرات الجهل والمغره
يلطم على خده ويكسر جناحه
ويثنى له الطاروق كره وكره
الزول ياكبره وماكبر مطاحه
والراس ماينقل من العز ذره
ان مات ماتبكيه عين النواحه
وان عاش في كبده من الغبن حره
مثبور حي ما يسوي مساحه
ويرقب عليها كنه قصاص جره
فان شاف والا عاف كلب البراحه
ينثر على راسه نجوم المجره
ما للخطا المقصود عذر وسماحه
آمنت بالمكتوب خيره وشره
الا جزا العيال شقت سناحه
حتى يميز كل حي مقره
يشره على الرجال محزم سلاحه
لاصار مايحسب له الفين مره
وانا سمعت وشفت للنفس راحه
قرب من الله ولجنابي مبره
والهرجه اللي ماعليها فصاحه
اطعم بها فالقلب صبره ومره
صبري عليها ذل نفس ووقاحه
وانا نزيه العرض مبلوج غره
يموت رجل هيبته مستباحه
ويعيش حر تدفع القوم شره