وداعتك - شايع العيافي

اليا تربعنا على عرش بلقيس
علم رديفي يا زماني وقله

انا مزهية الدروع المتاريس
يبرى بنا عله ..وتشتد عله

وان روحت جرد السبايا مقاويس
جاء للثرى تحت المراثيع خله

مركاضنا طاله وكسب ونواميس
تشرب له البارد كبودٍ مغله

الله خلقنا للمنايا مراويس
نقفي ونرجع كثرةٍ عقب قله

مدخالنا مدخال ذيب الخداريس
ومطلاعنا مثل النجوم المطله

ياما حصل فايامنا من عواكيس
وياما جفينا حلةٍ لجل حله

نصبر على لطم التفق بالنواديس
من دون ستر الوجه ..ونقول لله

واليوم يا كثر الغثا والحواسيس
ماغير نسترها بروس الاجله

زادت وعدت عن جميع المقاييس
وحنا نمنيها بشوف الاهله

يا صاحبي خل الجروح المراميس
انهل غلاك من الحنايا وعله

عان المحاجر بالعباير غواطيس
تبكي وصار الدمع طبع و جبله

حملك طغا ..والجور تبرك له العيس
وانا تلقيته بدقه وجله

اخاف من سحم الليال المعابيس
تطري علي والليل ماراح كله

وانا صخيف الحال راعي هواجيس
والدرب ماعرفه ولانيب ادله

تنسم الشرقي وجاله نسانيس
بردي هيام..ودفوة الليل جله

اسمر على طيف العيون النواعيس
واضحك لتايهة الرموش المظله

واجر كفك للكفوف المفاليس
وانثر جديلك للهبايب وافله

وابدي عليك شفوف قلبٍ محابيس
ييبس لها ريقي وريقك تبله

واحط في قلبك دروب وعواسيس
تسبر مغاويره وتدخل محله

ياسيدي ماني زبون المباخيس
نفسي جزوع وكل عسرٍ تمله

اما مود ولا عليها طلاميس
هرج فصيح وكلمةٍ مستدله

والا على التخميس صفق السواديس
الله يبيح الحب والله يحله

وداعتك لاهنت ..لاغترك ابليس
عرض على قلبي بهونك وقله

واللي معلقك الضلوع المقاويس
انك وفيت ولا حصل منك خله