مدورين المرابيح - شايع العيافي
اشره على اصحاب القلوب المصاليح
اللي تجرعها السموم الذحيحه
تجبر على لاما الوجيه المكاليح
غبر النواصي مشغلين القريحه
النفس قفر نبته الورد والشيح
سلالها شوف الوجيه القبيحه
يابو محمد لاتعد المدابيح
ان كان لك قلب يضم النصيحه
دربك ورى العاقه بعيد المشاويح
تصبح لعيلات الروابع منيحه
فليا بدا لازمك لو وقتك شحيح
شوفك يقديك الفجوج الفسيحه
خل الردي ياقف من الذل ويطيح
وانهض على صم العظام الصحيحه
وش لك ورى سود الكلاب النوابيح
من قارب الحذاف عجل مطيحه
الحر يقفي لو دعته الملاويح
في شف تلعات الخشوم المشيحه
فيلا ومرك الله على هبة الريح
ياما حلا جمعا الوجيه الفليحه
ربع على الرفقه حراص مناصيح
بلاسم تشفي القلوب الجريحه
مجالس تزهى الرجال الطحاطيح
ادنى كرمها للمسير ذبيحه
اليا اقبل الطرقي بعيد المساريح
تقطع خواه شمام وتهب ريحه
ضو بها الرسلان كنه سوابيح
تقرظ لها سمر يغاغي فحيحه
وسوالف تجلى الهموم الزحازيح
طرايف حره وهرجه فصيحه
سوالف ما لطموها المشافيح
تقنى مماليك العقول الرجيحه
تامر بمعروف يغر السلاتيح
وتنهى عن المنكر خسيس الشريحه
هذي غناة مدورين المرابيح
ياللي تجرعة السموم الذحيحه