سابك - شايع العيافي
لمست جرح الغلا وارهقني غيابك
والليل وان جاب طيفك رحت ساريبه
اسبرك مغضي واغض الطرف لأهدابك
حتى عتيم الدجى تكهف مشاهيبه
ياطيف الأحباب قل لليل وش جابك
قله حداك الولع والا من الغيبه
الفتنه اللي كتبها الله باسبابك
الناس تنشد غثاها وش تسابيبه
ياما تعثرت قبل آقف على بابك
وياما تلعثمت قبل الشك والريبه
اخاف من هرجةٍ بالزور تحكابك
دربٍ يورد كلاب السوق ماليبه
ازبن علي وابشر انه خاب طلابك
ضلعٍ تذرى حيوده في مراقيبه
يزل عنك الردى وعيونه تهابك
كما تزل النصارى ...مكه وطيبه
لو كان ترضى علي الزود واشقابك
الضيف في حالتك سيد معازيبه
والا انت ما حرقني الا نار مشهابك
في صدري القفر لين انه عوى ذيبه
يعرج بي الشوق ومن الود يسرابك
والغبن للي خذا الملواح يوميبه
يموت باول دروبك لا تهقوابك
ويعانق الياس ماحقق مطاليبه
يانجم ياللي على النجمات يدعابك
ليلك خلاوي وانا غالي مجاليبه
لو تجمع اصحابك الغالين واحبابك
مافيهم اللي دوا علتك يحريبه
تجحد صوابك ومعهم تضحك بنابك
وانا اسرح بقلبك المفطوم واضويبه
سعيت لي بالهوى والحظ يسعابك
الين دميت قلبك وانفرا جيبه
وان كان غبيت جرحك داخل اسلابك
نبرتك يرسل بها همك مناديبه
الله يجيرك عسى مامرك وصابك
كفارةٍ للخطا والذنب تدريبه
وانا ما عذربك واكره فيك عذرابك
اخاف مركب هواك الريح تقفيبه
انشهد انك سنام العز وانسابك
قوم تقلط على العايل مواجيبه
عليك اوصي عيوني وآتلوابك
وآغبط دار تصبّح به وتمسيبه
يانجد دنق براسك واهضم هضابك
دامك مرابيه وفياضك ملاعيبه
شرقٍ من " المملكه" فالغرب من" سابك"
بيت الشرف تسمك اعماده باطانيبه
محسود بالخطوه اللي تسرق ترابك
وترابك يشرفه لامر يمشيبه
قله الاغاب لد الشوف باغيابك
وان جاء تعلقت بايدي في تلابيبه