اللقب - طلال الرشيد
ياصغيّر مايكبّرني لقب
ومايصغّرني إذا أنكرني صغير !!
ماخذينا الصيت من جمع الذهب
ولانَسابة شيخ أو قُربة وزير !
كاسبينه من هل السيف الحدب
الجنايز كان ماجاك النذير !
صيتهم نجمٍ على راسه لهب
سمْعوا الصقهان به وأجهر ضرير !!
بالوفاء تاريخٍ أبيض ينتصب
لا حكوا بالحق حيّين الضمير
ضيغميٍ للسناعيس أنتسب
لابةٍ طِلنا بها عرش ٍ كبير
عند حدّك ياكثير الهرج تب
ولاتمرّ النار وثيابك حرير !!
كان لك عز ّبذلّي فتعقب
والله ألاّ تبطي وحبلك قصير !
أحسِب إنّك من صناديد العرب
وأثر ساترتك عباتك ياغرير !!
ماحَسب للسوس زرّاع القصب
والقرادة مادرى عنها البعير !!
ولو حسبنا للحسايف والتعب
مابذرنا يالعصافير الشعير !!
عن هلك أبراي إلى الله وأحتسِب
الرجال اللي مجاراهم عسير !!
من قريش المصطفى وأبو لهب
والدغالب ماغَشَت عذب الغدير !
للرجال من الرجاجيل العتب
والزكاة تحلّ في حال الفقير !!!
لعن إبو وقتٍ غدينا به حطب
تحرقه نارٍ يثوّرها أجير !!
ما ألومك والزمن سوّى العجب
هو بقى غير الكرامه بالجفير ؟!!
ما أذلّ وراسي يشمّ المهب
لوبقى من شمّرٍ طفلٍ غرير
وما أهاب ولا يزلزلني غضب
الشجاعة ورث والعاقل غزير !!
ياصغيّر مايكَبّر باللقب
غير من هو كان من دونه صغير !!!