شعتني علوم الصيف - عبدالله بن نايف الرويس
شعتني علوم الصيف وارقلت للمسناد
ولاعاد يعذل واحد طافح شبله
آبي عبلة ضافي عليها كما السجاد
ديار يرود عدودها من يحب ابله
ولاعاد لي من يوم سال الشفا مقعاد
عتيبي وداري فوق ونحيتي قبله
مادامه وكد لي سيل وادي قليب عناد
انا ويش يحرمني شفا نجد والعبله
ابتبع هوى وضحا تحط البيد سناد
لها غير زين طبوعها خدة قبله
ليا سمعت الحادي نده ندهة الميراد
تقود اول الزعجول لول وتقرب له
ابيها ترفع فوق عن ساخن الانفاد
وتجي في فياح كل مصلاح يطرب له
انا في الديار الطامنه في تعب وجهاد
على كثر مرعاها مداخيلها خبله
عساها يساقيها المطر ديرة الاجواد
ولابيها لون ثمامها ينقلب ربله