مرت سنة - عبدالله عطية الزهراني
مرّت سنه والجروح تزيد بعد الغياب
ماتدري انّ الجروح تزيد بعد السفر
مرت سنه والسنين تمرّ مرّ السحاب
شف كم سحابه تمرّ وماتهلّ المطر
ياغيث وينك وانا بين الظما والسراب؟
استجدي الغيمه اللي قلبها من حجر
راح اجمل العمر والباقي من العمر شاب
وانا انتظر لا متى ياغيث انا بأنتظر؟
ياسيّدي وانفتح للحزن مليون باب
من يوم طوّل غياب الموعد المنتظر
هذا حبيبك بقى نصفه ف بعض الثياب
والنصف الاخر مع طول الطريق انتحر
هذا انا شاعر ن مريّت درب العذاب
اقراني ان كنت مثل اوّل تحب الشعر
ولا تدوّر لغيري دام هالقلب ذاب
من سبّتك ياحبيب ن يستطيب الهجر
مرّت سنه والجروح اضعاف بعد الغياب
وماادري سببها الهوى,والا سببها السفر