لو يعشق الجمعه - عبدالمحسن بن سعيد

لو يعشق الجمعه مسا الأثنين
مايلحقه حتى بثمان رجول

ياصاحبي والقرب طعمه زين
لاشك طعم البعد صعب يزول

ماقول وينك بس أنا اللي وين
ضيعت عمري في رجا المجهول

علمي بنفسي من متى للحين
وأنا آتطامر لك من ألمح زول

وشلون أبخفي والعذاب يبين
والرمش بدموع الشقا مبلول

مسكين يامسكين يا مسكين
من مثلي بغل الهوى مغلول

عرق بجوفي عله السكين
ينبض لك بقول وبليا قول

ياعين وش باقي بعد تبكين
ماللمصايب في سهرك حلول

من وين يلقاها الشقي من وين
من فجعته والا من المرسول

والله لولي بالحشا قلبين
ياقلطتك ماردّها المقفول

وإن صار سعر الوصل نار البين
وشلون أكاسر والثمن مقبول

ليت لسواد العين بس يدين
تحضنك فيها لأستدار الحول

صدق الخلايق كلها من طين
إلا انت خلقك بس من معمول

ولك وجنة بين العنب والتين
مفتول ورك ولك خصر مجدول

والشفه اللي مزلفه من لين
جمر تعكسه صفتين اللول

والصدر قبضة ولد خمس سنين
في حدبته راس أصبع معسول

والشعر موج يقبل التخمين
لا سود ليل ولا شقار خيول

والعمر ما عدّا حجا العشرين
من حولها يركض بدون حجول

والبدر صوره له بلا تلوين
والشمس صوره له وهو مشغول

كن الضحى وجهه ورى طرقين
والخشم سيف باتر ومصقول

يرضا وأشوف الغيم له ثديين
يتغر بها الطوقي فقع وسيول

سوالفه تظهر خفا تشرين
وإن التفت يبرى وجع أيلول

كن الغلا في ذمتي له دين
وكنه من عيوب البشر منخول

ياقف شعر وبخطوته تلحين
والفن وصف لعوده المنتول

وإن صافحك تنبت يدك يسمين
وإن كلمك تسكت كذا مذهول

بأمر الله أهدابه ترد العين
وبأمر الله أنفاسه دوى المشلول

ومن طرف عينه مأنذكر ناجين
تحتار مات لحاله ومقتول

يانفس وش باقي بعد تخفين
الصبر مطوي والوله مفلول

تكفين ياحال الشقا تكفين
حني خفوق العاشق المسلول

ولو مأدري إنك بالبلا تدرين
هانت ولا عشت العمر معزول

يالله ألا والحين إيه ألحين
ياجيته وإلا تمام القول

وحذراك يالجمعه من الأثنين
وش لك بمن تحفا وراه رجول