الشمري لا يغرك طبعه الهادي - علي الضوي

يالي تعرّضت درب الليل ياغادي
ليلٍٍ تخالف دروبه مالك وماله

جنب دروبي ولا تمشي بلا قادي
وان مال دربك انا اواسيه وابراله

وانا ادري انك بوادي .. واني بوادي
لكن مع الميل بعض الناس ميّاله

لا تكتب اسمك خطا وتقوللي عادي
حدك ومن شاف حاله ماستر حاله

واللي بحكي الردى راضي ومتمادي
"ابتفل" بمجلسه وآكب فنجاله

"الشمري " لايغرك طبعه الهادي
ان مال وقته عنيد وميل عقاله؟

وانا عنادي خبال وخبل بعنادي
واخبل خبل من عنادي ياخذ خباله

نعم بدو وانتم التالين يالغادي
والجاهل نعلمه ونعلم اشكاله

معنى بدو: من بدا ومعنى بدوي بادي
يعني بدينا العرب رجلي وخياله

اجدادي الي بنوا لايامي امجادي
تاريخهم هو قدوع الوقت ودلاله

وش قرب اجدادك الهافين لاجدادي
متى تساوت حريم الدار برجاله

لابوك وقتٍ يهين الحاضر البادي
ولابو زمانٍ يدوس الحق بنعاله

حنا " الطنايا الضياغم " عد يا عادي
حنا " السناعيس شمر" دل ياداله

بيباننا تحتمي للجار وتفادي
ورضيعنا ينحني للضيف بزماله

والطيب ذود( وشمّر ) كلها حادي
ترعاه من فيضه لفيضه وتحداله

يافرقنا لو تقول بلادك بلادي
صوتك مثل أي صوت وصوتي لحاله

ما نسمعك لو تجر الصوت وتنادي
وانالو اهمس تعج البيد برماله

صمتي طويل المدى ماتاصل ابعادي
وصوتي بعيد الصدى ماتلحق ضلاله‍

إيه بدوي ما البس الا ثوبي وزادي
طبخ مرتي وانت زادك طبخ " شغاله"‍‍

إيه بدوي ما اعرف( بابا ولا دادي )
هذا كلام الدلع لحضير وامثاله

واللي لبس بنطلون وشجع النادي
بناتنا الغافلات ارجل من عياله

تاريخي لياحكيته مسك وكادي
والا انت ماينحكي تاريخك زباله

لاجييت آبعد فعلك تفضح اعدادي
لنك ردي والردي ما تستر افعاله

لاسولف الكذب قلت الحين ميعادي
آقف ولا اداري الكذاب وادراله

ما اموت ضامي وبير الحق ميرادي
آرد واصدر بدلو البير وحباله

وان كان بالحق موتي هذا ميلادي
آبتكفن لموتي وآتهياله

بس انت جنب ولا تمشي بلا قادي
وليلٍ تخالف دروبه مالك وماله

حرام لا شفتك اني لاافلت زنادي
والله يلعن ابو الشيطان وعياله