اصدق الفجرين - علي الضوي

من قريت الشعر .. وانتي أعذبه
من كتبت الشعر .. وانتي مستحيلة

كل بيت ٍ ينحي لك .. أكتبه
واتوضى من سحابك .. وانحني له

كان صعبه سهل .. لكن صعّبه : ..
كثرة اوراقك وانا حروفي قليلة :

اليدين بلا خضاب .. مخضبه
والعيون بلا كحل .. تمشي .. كحيله

والخدود صفوف ورد مرتّبه
بعثّرني .. يوم بعثرهن جديله

عندك اسرار الظلام مغيّبه
.. تحت ليل ٍ .. شكلك العالم بليله

للشفايف .. كل ساهي منتبه
في سكوتك .. كيف اجل لو تضحكي له ؟

كنّها بيدين طفل معذّبه
لارحمها .. ولاشفى منها غليله

أصدق الفجرين .. صبحك يسكبه
وف جبينك .. يلقى حسّادك دليله

إن وقفتي .. تنحني كل رقبه
وان مشيتي .. كل هالدنيا ذليله

ودي اسكت .. لكن ارضك طيّبه
ودي احكي .. لكن افكاري بخيله

لو سألتيني : وش اللي تطلبه ..؟
قلت : قلب ٍ يشتكي لي .. واشتكي له

لو سألتيني : وش اللي تكتبه ..؟
قلت : شعر ٍ ينحني لك .. وانحني له