إرفع هامتك - فالح الدهمان الظفيري

إرفع هامتك وإرقى على هامة مغاليبك
توطّى من توطّى شِيمتك وإنزل مضاربها !

عَربنَا ما إكتفت منّك ومن طِيبك وتعذيبك
تسخّرت وتمسخرت لهواها ولمطالبها !

زمانك فات عمرك فات غريب الذات وفجيبك
ثمن نفسك ثمن لمسك وشمسك فى مغاربها !

حياتك كلّ لذاتك تماكَنها فمخاليبك
قبل تُطعن بها إطعن تعقرَب مع عقاربها !

ترى لو ما شربت الما بكفّك من مشاريبك
فلا تِتنى كفوف الناس تجلب لك مشاربها !

زمان الخيل والبارود طَرَبت وزان تطريبك
ديارك من فضا ونارك غضا ودنياك كاسبها !

بليّا حدود بليّا قيود وصلت أبعد مطاليبك
ضربت الارض طول وعرض نزلت أعلى مناكبها !

عزيزٍ شامخٍ منصوب على قمّة مكاسيبك
وَلاَ داسُوك بأقدام المهانة ولا رضيت إبها !

أراك اليوم مسلوب الكرامة بين أصاحيبك
ضعيف الحال ماتقوى على الدنيا وطلايبها !

فلا لك راي ولا كلمة ولا أحدٍ به ينادي بك
عقب ماكانت الدعوة قصيدة وأنت صاحبها !

ألا ياصاح ياذيب العرب ياطول تغريبك
مع وقتٍ على مثلك تعَاوَت به ثعالبها !

تبي ذيك السنين اللّي صداها دوم يطري بك ؟!
تمنّاها عقب ما أقفت بها عنّك ركايبها ؟!

شف الأيّام وش سوّت ؟! على مجدك عقب شيبك !
عناكبها على مجدك بنَتْ مجد لعناكبها !!

ولا تعجب من الدنيا إذا خانت أساليبك
ترى الدنيا لعوبٍ والخيانة فى ملاعِبها !

تجي مرّة تغنّى لك مثل بنتٍ تغنّي بك
ومرّاتٍ عجوزٍ بالسواد إتصيح شايبها !

بها نفسك بها مستقبلك وأيامك وغيْبِك
ولاتدري وش اللّي خبّته لك فى غياهبها ؟!!

وإلى منّك سألته وش ورى غابة أكاذيبك ؟
تواعِدك ويمين إبليس تمسح به شواربها !

لعوبٍ هي كذوبٍ هي وأهلهَا صوت تكذيبك
بهم شالت أمانيّك وخَذَتهم في مراكبها !

تمنّى ياخويّ الذيب تمنّى وإن عوى ذيبك
ترى عنْك الأماني كم بعيداتٍ مقاضبها !