قدرت اشتري نفسي - فهد دوحان
نعم جيت أمد ايدين الأحلام ، وش يعني
تمد اليدين ولابه انسان مد إيده ؟
ولو مالقيت أحدٍ بهالارض يسمعني
اذا رفرفت من غابة الصدر تغريدة
وضاق الفضا الارحب ، والانفاس توجعني :
وصار المدى الواسع مثل حزن تنهيدة
اهد الورق في وجه الايام وأجمعني
أنا من صنع حريته من قفل قيده !!
قصيدي هو أرضي/موطني فيه انا المعني
بأفراحه بأتراحه بحزنه بعيده
بطعمه ، بما به من احاسيس ترفعني
عن الارض واعبر كل بساتينه وبيده
باغانيه ، واطفاله بالاوراق تزرعني
وفي عنفوانه يشطب الحلم ويعيده
بضعفي وانا يوم اكتبه حزن ينزعني
وفي قوتي يوم اعرِف اني بترديده :
قدرت اشتري نفسي ولاكان يمنعني
ابيع القليل من الحيا ، غير تأكيده !!
عرفت أكثر من اللازم وكان ينفعني :
لو اني اغض الجرح والهى بتضميده
ولكن عطيت القلب ماكان يقنعني
يضره ، ولكن كثْر ماضره يفيده
وكم قلت له : لو ما تشقيت بك بعني
ولو جيت لك صدر تدلت عناقيده
تشرفت بك ياشعري اللي مجوعني
عن الزور،ومطعمني من الحمد كسب ايده
على كل ضيق صدورهم كنت واسعني
متى البرد طفى في ضلوعي مواقيده
صنعتك مثل ما اظن الانفاس تصنعني
على مفترق حلم آتلمس مواعيده
ولا خفت من نهاية السطر تصفعني
قريت الطريق اللي بقى قلت ابا آزيده :
يعيش ويموت بداخلي لين يفجعني
الانسان ابن هذا الوجع وابن تسهيده !!