وأنا وحدي - فهد دوحان
وأنا وحدي على رمل البحر هذا المسا
متهالك وظامي
أغني :
لا متى يالبحر وحدك من عرف
معنى يباسي
صرختي
تلويحة الدمع بعيوني وانكساري
فوق رملك - أجمع أحلامي !!
أنا فعلا قدرت أحياك ..
يا هذا البحر وأقراك ..
وأتهجى سنيني كلها في ظلمتك
وأمشيك مترامي ..
من أول ضحكي الطيب
الى آخر بكاي المر
وكل رعشة هوى بالشوق هزتني،
وكل أحباب مروا في حياتي مثل
ليلة حلم ،
الى هذا المسا فوق رملك
نكس أعلامي !!