الفوانيس - فيصل اللويش
سورٍ قبل سورٍ وسورٍ بعد سور
متاهة الاسوار حزن الفوانيس
لاخاطرٍ راضي ولاهو بمكسور
من فوقها القربه وعطشانه العيس
رمل اندفن في رمل وقبور بقبور
للعامريه عين حجانها قيس
بالذاكره قبرٍ قديمٍ ومهجور
لاهو قبر شيخٍ ولاهو لقديس
للشعر في صدري تقاطيع وحضور
واحساس لاوالله عدة احاسيس
من قيد احزانك بالاوراق معذور
من يطلق عنان القلم للهواجيس
ياما غفت من عمرنا شهور وشهور
مانحسب حسابٍ للاعماق ونقيس
ماني نبي وادمح ولاني بمجبور
وش جابني وش جاب مثلي لأدريس
قالولي مغرورٍ ولاانته بمعذور
حتى غرورك تحسب انه نواميس
قلت الحيا ماهو غرورٍ ولاقصور
وان قلتوا أغرورٍ انا اقول ببليس
معذور انا لو قالوا الناس مغرور
وشلون منّغر والرفاقه سناعيس