يا بعد فرق الناس - محمد الأحمد السديري

يا عمير ناولني من الكيف فنجال
بالصين صبه لي على قدر شفي

فنجال يغدي ما تصور على البال
يزيل هم بالفواد امتخفي

يا عمير في قلبي من الهم ولوال
حر سعر بالقلب ماله مطفي

يا عمير لا تتبع هوا بعض الازوال
اقبل وخله يالعتيبي يقفي

لا تتبعه يا عمير يا طيب الفال
خله على حوض الرذيله يهفي

ومن لا استشارك لا تعذله ولو عال
يلقى من اجناسه صديق يلفي

يا بعد فرق الناس رجلي وخيال
والطيب بين مثل حيد مشفي

وان جاك مكار على الناس محتال
لياك مع ما قال لك تستخفي

الناس فيهم للاجاويد ختال
للخبث عن درب الفضيله يلفي

وان حذتك دنياك في بعض الاحوال
اعنز على ليث عرينه يدفي

ما يلتفت في قول شامت وعذال
وان كبرت القالات ما يستخفي

اخطر على المخطين من ليث الاشبال
ومن حق عدوانه لحقه يوفي

ما هوب خطو البايه الخامل الذال
اللي عن الطولات جفنه يقفي

مثل الثمد ما ورده كل حوال
ملح بصبخات ورسه يصفي